Fecha actuación: 27/07/2018
La idea de Spanta la Xente ñaz onde ñacen toles grandes idees d’esti mundu, dempués d’una bona fartura y unos culinos de sidra. Un grupu d’amigos con un mesmu interés de mancomún deciden xuntase pa facer lo que más yos presta. Al son de los primeros acordes yá empiecen a pensar en nueves incorporaciones que dean un pocu más de vida a la formación. Spanta la Xente un grupu musical pero tamién un grupu d’amigos qu’intenten tresmitir al so públicu les ganes , la ilusión y l’amistá que los xunió y qu´ a día de güei fai qu’esti proyeutu tire p’alantre. Hai quien diz que tienen un estilu más cercanu al folk, otros que al rock y otros dicen que “suena a una copia de daqué”. Spanta la Xente suena a folk, rock, pop, reagge, ska ensin escaecer tampoco lo tradicional. Ye un proyeutu abiertu nel que cada miembru vien d’un estilu de música distinta, notable al escuchar los sos cantares. Los sos cancios lleven márques del folk y´l rock, con lletres escrites n’asturianu y que tomen hestories de la minería, de les cuenques mineres o de mitoloxía, ente otres. Un estilu que pue gustar o non, pero que nun dexa indiferente al que lo escucha.
